Atzo, martitzena (irailak 18), estreinatu zuten Eibarko Ospitalean ipini duten dentsitometro berria, 17 pazienterekin. Debabarreneko, Debagoieneko, Goierriko eta Urola Garaiko herritarrei emango die zerbitzu, eta, lehen egunean, Zumarragatik, Azpeitiatik eta Azkoitiatik bertaratu dira pazienteak. Marisa Aldalur azkoitiarra izan da bat, eta, kontatu duenez, berarendako “erosoagoa” izan da Eibarrera joatea Donostiara baino eta makina berria bera ere “erosoa” iruditu zaio. Ospitaleko ordezkariek, berriz, adierazi dute “pozik” daudela “pazienteei zerbitzu on bat emateagatik, gertutasuna eskaini ahal izateagatik eta kontziliazioan” laguntzeagatik. 75.000 euroko kostua du dentsitometro berriak, BEZ barne. Argazkian: Itziar Araiztegi teknikaria, Marisa Aldalur pazientea eta Argiñe Ansorregi teknikaria.

600 bat lagunentzako lekua egongo da beste behin ere Aldats pilotalekuan egingo den bazkari herrikoian. Guztia txukun irten dadin, antolaketa lanetan aritzeko boluntarioak beharko direla azaldu dute aurten ere antolatzaileek; laguntzeko aukera ezberdinak izango dira.