Deba eta Itziar arteko N-634 errepidea erabat itxi zuten atzo arratsaldean (16:30ean), segurtasun arrazoiengatik. Gipuzkoako Foru Aldundiak jakinarazi bezala, etenak bi erreietan izango du eragina eta itxita mantenduko dute eremua egonkortu artean. Datarik ez dute zehaztu oraindik.
"Prebentzio-neurri hori hartu da eremua egonkortzeko lanak egiten ari direlako, eta lurraren ezegonkortasun arazoak konpondu behar direlako; izan ere, lur-jausi bat izan zen bertan", gogorarazi dute.
Lur-jausia urtarrilaren 27an izan zen, N-634 errepideko 43. kilometroan, eta bidea itxi behar izan zuten. Pare bat egun beranduago, urtarrilaren 29an, errei bat zabaldu zuten eta harrezkero trafikoa semaforo bidez erregulatu behar izan dute. Gipuzkoako Foru Aldundiak otsailaren 13an jakinarazi zuen errepidean larrialdiko esku-hartzea egingo zuela; lanen iraupena hiru hilabete eta erdikoa izango zela ohartarazi zuen, eta, hortaz, maiatza amaitu artean errepidea errei bakarrera mugatuta egongo zela jakinarazi zuen. Atzodanik, ordea, erabat itxita dago bidea.
Horiek hala, gidariei ordezko ibilbideak erabili behar dituztela gogorarazi diete. Debatik Itziarrera joateko, San Rokeko bidea erabiltzea gomendatu dute; Itziartik Debara joateko, aldiz, herritarrek Lasturko bidea (Sasiolatik) edota autopista (Elgoibartik) hartu beharko dute.