Gipuzkoako Foru Aldundiak gaur arratsaldean jakinarazi du larrialdiko esku-hartzea egingo duela Deba eta Itziar batzen dituen N-634 errepidean. "Bertan egingo diren lanen barruan, material ezegonkorrak kenduko dira, lurrean ainguratutako euste-sistema bat instalatuko da eta drainatze-kanalak eraikiko dira, luizien arriskua gutxitzeko. Aurreikusitako inbertsioa 600.000 eurokoa da, eta lanen iraupena hiru hilabete eta erdikoa izango da, maiatza amaitu arte", azaldu du hedabideetara igorritako prentsa oharrean. Epe horretan, errepidea errei bakar batekin egongo da irekita eta trafikoa semaforo bidez erregulatuko dute, txandaka.
Urtarrilean izan ziren euriteek lur-jausia eta harrien erorketa eragin zuten N-634 errepidean, 42,250 eta 42,350 kilometro-puntu artean, eta horrek errepidea ixtea ekarri zuen urtarrilaren 27ko goizaldean. Mantentze-lanetako taldeek material eroria kendu eta babes-hesiak jarri zituzten, baina aldundiak aipatu du ondorengo euriteek egoera "larriagotu" egin dutela, luizi berriak eraginez eta harrizko bloke zein zuhaitz batzuk erortzeko arriskuan utziz. "Gainera, azterketa teknikoek lur ezegonkor metatua atzeman dute ezpondaren goialdean, hainbat puntutan ura filtratzen ari dela egiaztatuz, eta horrek luizi berrien arriskua areagotzen du", ohartarazi du.
Horiek horrela, aldundiak larrialdiko esku-hartzea egitea erabaki du ezponda egonkortzeko eta errepideko segurtasuna bermatzeko. Azaldutakoaren arabera, lanetan, besteak beste, sarbide bat eraikiko da material solteak eta erortzeko arriskuan dauden zuhaitzak kentzeko, aingurekin lotutako euste-sistema bat instalatuko da eta ur-pilaketak saihesteko drainatze-kanalak sortuko dira.
Informazioa Telegram aplikazioan
Debako Udalak gogorarazi du, bestalde, Gipuzkoako kostaldeko errepideetan ibili ohi diren pertsonek trafikoaren egoerari eta izan ditzaketen gorabeherei buruzko informazio eguneratua jasotzeko aukera dutela Gipuzkoako Foru Aldundiak horretarako baliatzen duen Telegram aplikazioko kanalean.
Eguneratze horiek jaso nahi dituztenek honako estekara jo beharko dute: https://t.me/N634_Kosta