Pasa den urtarrilean Oihana Irustak EH Bildu udal taldeko zinegotzi karguari uko egin zion osoko bilkuran. Oihana Irustaren kargu uztea arrazoi pertsonalengatik izan da eta udal taldeak babesa adierazi dio hasieratik. Irustak bere esker ona adierazi dio EH Bilduri eta Debako udalean urte eta erdiz taldekide izan dituen lagunei. Horrez gain, honakoa gaineratu du: "Erabaki hau ezinbesteak bultzatuta hartu behar izan dut eta, gustura eta gogotsu banengoen ere, egoerak kargua uztera eraman nau".
Atzo egin zen osoko bilkuran Jon Ander Urainek hartu zuen EH Bildu udal taldeko zinegotzi kargua. "Pozik eta gogotsu" agertu da zinegotzi berria, eta "bizitzako esperientzia berri honetaz ikasteko borondatez" dagoela gaineratu du. Urain zazpigarrena izan zen EH Bilduren 2023ko hauteskundeetarako hautagaien zerrendan; zerrenda bozkatuena izan bazen ere, zazpigarren zinegotzi gisa sartzeko hainbat botora geratu zen. Adierazi duenez, "gazteok gure udalerriko eta tokiko politiketan inplikatzea garrantzitsua da, guk erabakitzen ez duguna beste batzuek erabakitzen dutelako". Gainera, egiteko moduei dagokienean, ondokoa nabarmendu du: "Herritarrak, eragileak eta udala saretzea ezinbestekoa da bestelako harreman komunitarioak garatuz eta zainduz, agintaldi honetan gailendu diren egiteko modu hierarkiko eta zaharkituak aldera batera utziz".
Jon Ander Urain debarrak 27 urte ditu eta ingeniari elektronikoa da ofizioz. Herrigintzan ibilbide luzea du Urainek eta ondo ezagutzen ditu kultur arloko dinamikak. Atzotik udalbatzako zinegotzi gazteena da.