Atzo eguerdian egindako agerraldian, Unai Larreategi Soraluzeko alkateak zein Itziar Murua EAEko hauteskundeetarako Gipuzkoako hautagaiak hartu zuten hitza Debabarrenari buruz berba egiteko. Haiei laguntzen izan ziren Ermuko, Eibarko, Elgoibarko, Mendaroko eta Debako EH Bilduko zinegotziak eta zerrendakideak.
Larreategik adierazi zuenez, “historikoki, bere izaera industrialaren eraginez, ongizate sozioekonomiko handiko eremua” izan den arren, orain, “jaisten” doa Debabarreneko ongizate-maila.
"Politiken ondorio"
Datuak emanez, esan zuen “2020-2023 urte bitartean %22ko enpresa-galera” izan zela, “ehun enpresatik gora itxi edota beste lurralde batzuetara mugitu” zirela. Halaber, gogora ekarri zuen Eibar eta Soraluze direla Gipuzkoan langabezia mailarik altuenak dituzten udalerriak.
Larreategik gaineratu zuen Debabarrenean eman den bilakaera hori “azken hamarkadetan garatu diren politiken ondorioa” dela, eta ezinbesteko ikusten du “lurralde orekan sakontzea”. Horretarako politika aktiboak behar direla defendatu zuen, “industriaren joerekin bat egiteko”, zein “ekonomia jarduera berriak” teknologia berrietara egokitzeko, eta azpimarratu zuen “ezinbestekoa” dela industria 5.0rako trantsizioa” egitea.
Maltzagan intermodala eta beste
Horrez aparte, mugikortasunean ere jarri zuen iparra Larreategik, esanez hori ere badela “herritarren kezka iturri”. Soraluzeko alkateak azpimarratu zuenez, “garraio publikoan hobekuntza nabariak egiteko moduan” daude, “bai eskualde barruko zein kanporako zerbitzuari dagokionez”.
Larreategiren berbetan “jauzi kualitatiboa” suposatuko luke ingurumenean zein gizarte kohesioan. Adibide modura, aditzera eman zuen Maltzagan intermodala jartzea bultzatuko dutela eta ildo beretik, Durangoren eta Debaren arteko trenaren maiztasuna handitzea, 10-12 minutukoa izan dadin.
Oro har, Larreategik Debabarrenaren oraingo egoera “iraultzeko aukera” ikusten du, eta hori egiteko aldaketaren beharra azpimarratu zuen, lurralde oreka ardatz izanda: “Debabarrena biziberritzeko ponentzia martxan jartzea lortu genuen Gasteizko Legebiltzarrean, eskualdean indartsu daukagu oraindik industria, goi-mailako zentro teknologiko eta ikaskuntza zentroak dauzkagu... aukerak errealitate bihurtzeko ordea, herri honek aldaketa behar du, lurralde oreka ardatz izango duen aldaketa”.
Industria 5.0
Ildo beretik jo zuen Itziar Murua hautagaiak. Hark azpimarratu zuen beharrezkoa dela “industria politika ekintzailea (…), lidergo publikotik euskal industria-eredu iraunkor, sozial eta aurreratua eraikiko duena”.
Horrekin batera, berrikuntzaren eta teknologiaren aldeko apustu “irmoa” defendatu eta Muruak esan zuen EH Bildutik gizarteko eta alor politikoko, ekonomikoko eta hezkuntzako eragileen arteko “herrialde-akordioa” lideratuko dutela, “2027rako BPGaren %3,2 a I++B politiketan inbertitu dadin, Europako eskualde aurreratuenen pare jarriko gaituena”.
Industriarekin lotuta, berriz, Gipuzkoako hautagaiak ere Industria 5.0-rako jauzi beharra azpimarratu zuen, horretarako beharrezko diren azpiegiturak eraikitzearen alde egin zuen eta iragarri zuen “hori bultzatzeko formazio, demostrazio eta zerbitzu zentroa sortzeko lanean jardungo” dutela.
Zentzu berean, iragarri zuen “Inbertsio Estrategikorako Funts Subiranoa” sortuko dutela, “orain arte mobilizatu diren zuzkiduretatik nabarmen gorago egongo dena, euskal enpresak lurraldean errotzeko, euskal enpresa estrategikoen kapitaleko partaidetza publikoa bideratzeko eta inbertsio estrategikoak sustatzeko”.