Udako denboraldiari begira, hondartzako pasealekuan izozkiak eta gozokiak saltzeko hiru postu kontratatzeko prozedura abiatu du Debako Udalak. Azaldu duenez, kontratazio horren bidez, bereziki uda sasoian hondartza inguruan batzen den turismo eta aisialdi jarduera osatu nahi du udalak, "herritarrentzat eta bisitarientzat eskuragarri dauden zerbitzuen eskaintza zabalduz eta hobetuz".
Hiru saltokiak pasealekuan jende gehien biltzen den puntuetan kokatuko dira: bata pasealekuko lorategian, bestea hondartzako sarrera nagusiaren aurreko aparkalekuan eta hirugarrena eskuineko aparkalekuan. Postuak desmuntagarriak izango dira, eta ingurunearekin bat datozen irizpide estetikoak bete beharko dituzte. Horri jarraiki, ezinbestekoa izango da zurezkoak eta kolore neutrokoak izatea, inpaktu bisuala minimizatzeko.
Emakidak bi urteko iraupena izango du, eta beste bi urtez luzatzeko aukera egongo da (urtez urte). Denboraldia Aste Santuan hasi eta urriaren 31ra bitartekoa izango da.
Baldintzak eta betekizunak
Kontratazio-prozesuan jasotako betekizunen artean, pertsona edo enpresa interesdunek, besteak beste, elikagaiak manipulatzeko txartela izan beharko dute, erantzukizun zibileko aseguru-poliza bat aurkeztu beharko dute eta elikagaien higieneari eta segurtasunari buruz indarrean dagoen araudia bete beharko dute.
Era berean, postuetarako baimendutako gehieneko azalera 9.25 m2-koa izango da. Horri lotuta ezingo dira mahaiak, aulkiak, hozkailu gehigarriak edo baimendutako salmenta espazioa handitzen duten bestelako elementu batzuk jarri.
Eskaintzak udaletxeko arreta bulegoan edo udal erregistro elektronikoaren bidez aurkez daitezke, otsailaren 12ra bitartean (ordu-muga: 14:00). Eskaintzak gutun-azal bakar batean aurkeztu beharko dira, kontratazio-oinarrietan ezarritako dokumentazioarekin. Dokumentazio hori Debako Udalaren kontratatzailearen profilean kontsulta daiteke.