Bihar (urriak 8), asteazkena, L itxurako hormen bidezko babes-balizamendua kentzeko lanak hasiko dituzte Deba eta Itziar batzen dituen N-634 errepidean. Gipuzkoako Foru Aldundiko iturriek jakinarazi dutenez, mendi-hegala egonkortzeko larrialdiko lanak egin dituzte orain arte, "aurreikusitako jardueren lehentasunezko fasea amaitu ondoren".
Lanak direla eta, bidea bihar minutu batzuz itxi egin behar izango dutela iragarri dute; azaldu dutenez, langileak arduratuko dira unean uneko errepide mozketak egiteaz eta zirkulazioa txandaka bideratzeaz. "Horregatik, ordezko ibilbideak erabiltzea gomendatzen da, eta urriaren 8an eta 9an N-634 Deba-Itziar errepidea ez erabiltzea", azpimarratu dute.
Aldundiaren esanetan, abenduaren hasieran errepidea guztiz irekitzea espero dute, aldi berean egiten ari diren Irulearen Begiratokiko oin-horma egonkortzeko obrak amaitzen direnean.