Martxoaren 24 eta 28 bitartean janari bilketa egin da Debabarreneko zortzi udalerrietan, Greziako Lesbos uharteko kanpamentuan dauden pertsona errefuxiatuen artean banatzeko. Martxoaren 29an (pasa den zapatuan) amaitu zen erronka, Ermuko Orbe Kardinalaren plazan burutu zen Tuper Solidarioa ekitaldiarekin. Gerturatutako herritarrek, bost euroren truke, bazkaltzeko tuperra jaso ahal izan zuten: Sukaldari debabarrendarrek prestatutako arroza oilaskoarekin, dilistak bakailaoarekin eta fruta pieza bat.
Zaporeak proiektuko arduradunek eskerrak eman dizkiete elkartasun ekimen honetan parte hartu duten herritar eta boluntario guztiei: "Zuenak bezalako eskualdeek posible egiten dute gure proiektuak aurrera jarraitzea eta guk lanean jarraitu ahal izatea. Zuen laguntza oso garrantzitsua da milaka pertsonak, haurrek, gizonek eta emakumek janari duina jasotzen jarrai dezaten beraien migrazio bidean".
Hamar artelan, hamar afari
Janari bilketarekin batera, zozketa bat jarri zuten martxan Zaporeak elkarteko kideek, janarien bidalketa gastuei aurre egiteko eta Grezian bertan nahitaez erosi beharreko jakiak eskuratzeko. Errifak euro bakarrean saldu dituzte, eta Debabarreneko hamar artisten margolanak eta bi lagunentzako beste hamar afari zeuden jokoan. Jarraian zenbaki sarituak, tokatu zaien obraren egilea eta jatetxea:
| SARITUAK | Artista | Jatetxea |
| 0679 | Elisabet Eguren | BELAUSTEGI |
| 2273 | Angel de la Torre | KONTENT |
| 2277 | Maite Zanguitu | PIPER |
| 3098 | Mauri Martín | BARATZE |
| 3290 | Marina Barrena | LANDA |
| 4510 | Esteban Oroz | CASINO A. EIBARRES |
| 4307 | Begoña P. Aizpun | SAGARRA |
| 5116 | Yolanda Capelo | KISKA |
| 5528 | Esther Galarza | BULEBU |
| 5880 | Leire Kareaga | SALEGI |