Euskal Kostaldeko Geoparkeak bisita gidatu berria gehitu dio urteko ohiko programari. Bi ordu eta erdi irauten duen bisita horretan, haurrek Geoparkeko Flyscheko fosilak ezagutzeko tailerraz eta itsas zeharkaldiaz gozatzeko aukera izango dute.
Antolatzaileek azaldu bezala, "etxeko txikienek mineralak eta fosilak ezagutzeko hainbat jolas eta eskulan egingo dituzte, ordubete inguruz. Mutrikuko amonite erraldoien sekretuak ezagutzen aritu ondoren, itsasontziz zeharkaldia egitera abiatuko dira. Flysch beltzaren labar ikusgarriak itsasontzitik eta bertatik bertara ikusteko aukera izango dute, Mutrikuko portua eta Saturrarango hondartza ederraren artean dagoen gunean".
Bisitan parte hartzeko ezinbestekoa da erreserba egitea, bisitari kopuru mugatua baitute. Erreserbak egiteko edota ekimenari buruzko informazio gehiagorako Geoparkearen webgunera jo beharko dute herritarrek. Halaber, webgunean bertan ikus daiteke bestelako jardueren eta bisiten inguruko informazio guztia.