Gure Esku herri ekimenak ekainaren 7an Bilbon egingo duen mobilizazio nazionala girotze aldera, bilera irekia deitu du gaurko (martxoak 24) Debako eta Itziarko talde eragileak. Zehaztu dutenez, 18:00etan izango da hitzordua, Debako Arrano elkartean.
Hainbat urtetako lana atzean utzita, iazko martxotik Herri libre bat lelopeko fasean murgilduta dago Gure Esku herri dinamika, eragile soziopolitikoen eta euskal lurraldeen arteko lankidetzan sakondu nahian. Bi urteko erronka hartu zuen iaz herri dinamikak, eta hain justu dinamikaren hurrengo ekinaldien nondik norakoak azalduko dituzte gaurko bileran, baita hurrengo pausoak zein izango diren ere.
Dinamikaren berri emateaz gain, udalerriko talde eragilea "berriz martxan jartzea" da Debako eta Itziarko Gure Eskuren nahia. Hori horrela, gaurko bilerara nahi duten herritar guztiak parte hartzera gonbidatu dituzte.
Afari herrikoia Itziarren
Herriko dinamikarekin jarraituz, apirilaren 4rako afari herrikoia antolatu dutela iragarri dute Debako eta Itziarko batzordeko kideek. Itziarren izango da jaia. 19:00etan, Bikain jatetxearen parean hasiko den triki-poteoarekin emango diote hasiera festari eta, ondoren, afaria izango da Donibane elkartean.