Bihar (martxoak 8) manifestazioak egingo dituzte arratsaldean. Itziarko Erasoen Aurkako Taldeak antolatutako mobilizazioa Zabalsoro frontoitik abiatuko da (18:00etan), eta Deban ordubete beranduago (19:00etan) izango da hitzordua, DIT feministaren ekimenez, Foruen Plazan. Atzoko oihua gaurko indarra! Borroka feminista bizirik lelopean hartuko dituzte kaleak eta, azaldu dutenez, "belaunaldi desberdinek egin dituzten borrokak plazaratu eta aldarrikatu" nahi dituzte mobilizazioan. "Debako Mugimendu Feministaren ibilbidea ekarriko dugu gogora eta, beste behin, kaleak hartuko ditugu mezu erreakzionario eta faxistak zabaltzen dituzten horiei aurrean izango gaituztela oihukatzeko", nabarmendu dute.
Ondoren, Kalean Kantuzen emanaldia izango da (19:30ean).
Bestalde, etzi, martxoaren 9an, indarkeria obstetrikoari buruzko hitzaldia emango du Nahia Alkorta adituak Burugorri gainean (18:00etan).