Eguneko hitzordurik goiztiarrena Itziarko Zabalsoro frontoian egingo den Inauteri Festa izango da. Burugorri Martxan eta Lizarbe Guraso Elkarteak antolatu dute ekimena eta 16:30ean hasiko da. Norberak etxetik eramandako jakiekin osatutako askari baten bueltan batuko dira herritarrak eta, ondoren, buruhandiekin jolasean aritzeko tartea izango da. 18:00etan, berriz, mozorro showa egingo dute.
Debari dagokionean, 17:00etan Deba Musikaleko banda txikiak hartuko ditu herriko kaleak. Eta, ordubete beranduago (18:00etan), Haur Hezkuntzako eta Lehen Hezkuntzako umeei zuzendutako jolasari ekingo dio Zuhatza-Kolore Anitz Aisialdi Taldeak udaletxe azpiko arkupeetan. Ondo pasatzeko aukera izango dutela nabarmenduz, bertan parte hartzeko deia egin diete umeei.