Atzo (martxoak 3) goizean aurkeztu zuten kupoia, Geoparkearen egoitzan. Bertan izan ziren Usue Vallejo ONCEren Euskadiko ordezkaria, Ana Davila ONCEren Eibarko agentziako zuzendaria, Leire Barriuso Geoparkeko gerentea eta Alazne Txurruka Debako alkatea.
Martxoaren 12an zozkatuko da kupoia, eta berau irudikatzeko Sakonetako harkaitzak aukeratu dituzte. Denetara, Espainia osoan horrelako 5 milioi kupoi ipiniko dituzte salgai.
Usue Vallejok aurkezpenean azaldu zuenez, ONCEko kupoietan gizarteko ekitaldi eta geografiako leku esanguratsu eta enblematikoenetako batzuk islatzen saiatzen dira. "Horregatik, Deba, Mutriku eta Zumaia artean dagoen Geoparkearen irudia ONCEko kupoiaren protagonista egin dugu oraingoan".
Leire Barriusok, bere aldetik, eskerrak eman zizkion ONCEri Euskal Kostaldeko Geoparkea eta, zehazkiago, Sakoneta, hain publiko zabalari ikusgarriago egiteagatik. "Kupoia bezalako ekimenen bidez, gure lurraldeak duen ondare geologiko, natural eta kultural itzela mundura ateratzen laguntzen digu".
Debako alkatea ere pozik agertu zen ONCEk Geoparkea aukeratu duelako. "Gu harro gaude Geoparkearen parte izateaz Zumaiarekin eta Mutrikurekin batera, eta poztasunez betetzen gaitu ONCEk egin duen aurkezpen honek; guretzat oso pozgarria da".
500.000 euroko sari nagusia jokoan
Geoparkeari eskainitako kupoiaren zozketa eguneroko kupoi bati dagokio, eta jokoan dauden zenbaki guztiak eta seriea izanez gero, 500.000 euroko saria irabazteko aukera izango da. Bost zifrak edukiz gero, bestalde, 35.000 euroko 49 sari eskuratu daitezke.
Gainera, 250 euroko 450 sari banatuko dituzte lehen lau zifrentzat, eta beste horrenbeste azken laurentzat; 25 euroko beste 9.000 sari ere banatuko dituzte azken hiru edo lehen hiru zifrentzat. Lehen eta azken bi zifrak dituztenek, berriz, 6 euro eskuratuko dituzte eta saritutako zenbakiaren lehen edo azken zifrari jokatutako 2 euroak itzuliko zaizkie.