Debabarrena Eskualdeko Mankomunitateko arduradunak “kezkatuta” daude 2020aren erditik hona gaikako bilketaren garapenean eman den jaitsierarengatik eta gaikako edukiontzietan azaltzen diren hondakin inpropioen igoerarengatik. Mahai gaineratu dutenez, hondakinen gaikako bilketa hobetzeko eta bultzatzeko ekimenak (informazio kanpainak, bilketa berriak…) egin arren, datuak okertu egin dira urteotan.
Igor Aldalur mankomunitateko Ingurumen teknikariak esandakoaren arabera, 2023ko datuen arabera, %2,13 jaitsi da gaikako bilketa; oro har, iaz %54,28 batu zen gaika eta 2023an, berriz, %53,58. Horrekin batera, edukiontzi grisetan lagatako hondakin kopurua %0,67 igo da. Datuak xehatuta, hondakin organikoen bilketa da gehien jaitsi dena, %5,35; bestela esanda, 4.712 tonatik 4.460 tonara jaitsi da hondakin organikoen bilketa, urtean, pertsonako 65 kilo hondakin organiko batzetik 61 kilo hondakin organiko batzera pasa da.
Aldi berean, handitu egin da organikoen edukiontzietara botatzen diren inpropioen kopurua. Adibide modura, Aldalurrek jakinarazi du, astebetean, 3.295 poltsa inpropio antzeman dituztela edukiontzi marroietan. Gaikako bestelako frakzioei dagokienez, berriz, paperaren eta kartoiaren gaikako bilketa ere jaitsi egin da, 3.862 tonatik 3.778 tonara, %2,18ko jaitsiera. Eta ontzien eta beiraren bilketa mantenu egin da.
Praktika onak, inkestak eta beste
Datuak eskuartean, eta ikusita egiten dituzten ekimenek eta iniziatibek ez dituztela “dagozkien emaitzarik lortzen”, mankomunitateak erabaki du Gaikako Bilketa Hobetzeko Plana egitea kanpoko enpresa batekin, kasu honetan, Cimas enpresarekin lankidetzan. Plan horren baitan, hiru jarduera egingo ditu Cimas enpresak.
Bai mankomunitateak zein Cimas enpresak dagoeneko identifikatuta dute gaikako bilketaren emaitzan eragin handia duen aldagai bat: edukiontzi marroiak eta grisak ixtea
Batetik, emaitza onak ematen dituzten zonaldeetako praktika onak identifikatu eta dokumentatu egingo dituzte. “Bereziki Gipuzkoakoak, ze Gipuzkoan daude, batez ere, emaitzarik onenak”, azaldu du Cimas enpresako Zigor Garciak. Horrekin batera, Debabarreneko bizilagunei, enpresei eta komertzioei gaikako bilketaren inguruan inkestak egingo dizkiete, jakin nahian zergatik ez diren hondakinak gaika egoki bereizten. “Interesgarria da jakitea ea zeintzuk diren arazorik potoloenak eta horiek aztertzea”, dio Cimaseko ordezkariak. Azkenik, etorkizunean egin daitezkeen informazio kanpainetan zein mezu zabaldu daitezkeen ere mahai gaineratuko dituzte.
Hori guztia martxoa-apirilerako bukatuta izango dutela adierazi du Cimas enpresako ordezkariak. Dena den, bai mankomunitateak zein Cimas enpresak dagoeneko identifikatuta dute gaikako bilketaren emaitzan eragin handia duen aldagai bat: edukiontzi marroiak eta grisak ixtea. Aldalurrek azaldutakoaren arabera, pandemiaren ondoren zabalik laga zituzten eta justu, orduantxe hasi ziren datuak okertzen.
Gaineratu dutenez, urtarriletik aurrera ikusiko dute edukiontzi hori eta urdin berrien eragina ere
Era berean, ikusi dute praktika eta emaitza onak dituzten zonalde guztietan edukiontzi horiek itxita egoten direla. Beraz, plan berriak izango duen ezaugarrietako bat horixe izango da: edukiontzi grisak eta marroiak itxi egingo dituztela berriro.
Horren adibide modura, honako datuak helarazi ditu Igor Aldalur teknikariak:
- 2013-2014an, edukiontzi marroia itxi zenean, %30etik %40-42ra handitu zen gaikako bilketa.
- 2016-2017an, edukiontzi grisa itxi zen eta beste jauzi kualitatibo bat eman zen, 42tik %52ra pasa zen gaikako bilketa.
- 2018-2019-2020an %55era igo zen.
- Gero, 2020ko martxoan, pandemiarekin, edukiontzi grisak eta marroiak zabaldu egin ziren; 2021eko hasierara arte, datuei eutsi egin zitzaien, baina hortik aurrera, %55etik %53,5era jaitsi da.
Teknikariak esandakoaren arabera, horren guztiaren atzean egon daitezkeen arrazoiak ez dira identifikatzeko errazak. “Ez dut uste 2019an organikoa gaika banatzen zuen familia batek gerora dena nahasita aterako duenik. Bestalde, mankomunitatetik uste dugu presente egon garela kanpaina bitartez, komunikabideetan… baina datuak datu dira eta ikusten da ez garela iritsi edo detektatu ez ditugun aldaketa sozialak eman direla. Edukiontzi marroiak itxita, hori eginda bakarrik, ez dugu gaikako bilketa handituko, baina bai gutxituko ditugu inpropioak”.
Gaineratu dutenez, urtarriletik aurrera ikusiko dute edukiontzi hori eta urdin berrien eragina ere. “Baina, aldaketa sakonagoak eman beharko dira, batik bat, kontuan hartuta lortu beharrekoa %60ko gaikako bilketa dela”. Azpimarratu duenez, errefusaren eta organikoen edukiontziak ixtea “klabea” izango da. “Ikusi da errefusa itxi gabe ez dagoela emaitza onik”, dio horren harira Zigor Garciak.