Gaur (maiatzak 16) arratsaldean hasiko da ospakizuna, LH4tik DBH2ra arteko ikasleei zuzendutako paella lehiaketarekin; paseo estalian izango da, 18:30ean. Ordubete beranduago, 19:30ean, Kalean Kantuz taldeko kideen emanaldia izango da eta gauean, 22:00etan, Debako Musika Bandak kontzertua emango du elizako klaustroan.
Bihar (maiatzak 17) haurrentzako margo lehiaketa izango da goizean (sari banaketa arratsaldean egingo dute). 13:00etan Euskaraldiko kuadrillen arteko jolasen finala jokatuko da Plaza Zaharrean eta, ordu berean, Debako gaiteroen eta Banda Gaztearen kalejirak izango dira. Egitarauak arratsaldean izango du jarraipena: 17:30ean entzierroa egingo dute gurdiekin, 18:00etan sokatira jardunaldia egingo da zumardian eta 19:00etan kalejiran irtengo da Debako Musika Banda. 21:00etatik 22:30era Farola Sound System-en emanaldia izango da Plaza Zaharrean eta 23:00etan Nonbait erromeria taldea ariko da Foruen Plazan.
Urtero bezala, iganderako iragarri dituzte dagoeneko herrian ondo errotuta dauden eta ospakizun honetan bereziki esanguratsuak diren kultur jarduerak; 08:00etan Lizarrako gaiteroen diana izango da eta 08:30ean entzierroa eta sokamuturra egingo dira. 11:00etan ezpata dantza egingo dute Gure Kaiko kideek San Rokeko ermitan eta, ondoren, herriko elkarteek salda eta txorizoa eskainiko dituzte Foruen Plazan. 11:45ean erraldoien konpartsen desfilea izango da eta desfilearen aurretik, 11:30ean, omenaldia egingo diote Salvador Martinez gaiteroari Agirre jauregian, Musika Eskolaren ekimenez. Eguerdian, Gure Kaik aurreskua dantzatuko du Foruen Plazan, 13:00etan. Arratsaldean, aldiz, 18:00etan erraldoien alardea egingo da Plaza Zaharrean (euria egingo balu, Aldats pilotalekuan) eta egitaraua Ostarte taldearen erromeriarekin amaituko da (19:00etan izango da, Foruen Plazan).
HEMEN egitarau osoa.