Azken urteetako ohiturari jarraituz, desfilea izan zen larunbat eguerdian, bandak lagunduta. Adin guztietako lagunak animatu ziren Agirre jauregi pareko plazatik abiatu zen kalejiran parte hartzera, eta irudimenez jositako jantziak eta karrozak ikusi ahal izan ziren bertan.
Beste behin ere, handia izan zen herriko kaleak hartu zituzten pertsonaien aniztasuna. Ohiko mozorro klasikoen aldeko apustua egin zuten batzuek, baina beste batzuek gogotik pentsatu eta landu zituzten mozorro bitxi eta originalagoak ere: besteren artean, Rociora zihoan erromes kuadrilla, Urte berri txinatarraren festa ospatzen zebilen herritar taldea eta hileta bat parodiatzen zebilen kuadrilla ere irten ziren kalera.
Kalejiran parte hartu zuten guztiek Foruen Plazan bat egin ondoren, taldeak banan-banan igo ziren oholtzara, mozorroen erakustaldi berezia egiteko. Arratsalde-iluntze partean hitzordu gehiago ere izan ziren, hala nola mozorro desfileko irabazleen sari banaketa.