Euskal Herriko beste hainbat udalerritan egin duten bezala, Deban eta Itziarren ere hasita daude herritarren sinadurak biltzen. Pentsiodunek azaldu bezala, otsailaren 3an ekin zioten kanpainari, eta apirilaren 16ra bitarte egongo da sinadura emateko aukera.
Deban, adibidez, bi astean behin, astelehenetan, Foruen Plazan egiten dituzten elkarretaratzeetan biltzen dituzte atxikimenduak. "Otsaileko larunbat guztietan ere mahaia jarri dugu, 12:00etatik 14:00etara, udaletxeko arkupeetan. Gainera, aurrerago agian beste egun batzuetan ere sinadurak biltzen ariko gara". Itziarren, berriz, ez dute egutegi finkorik ezarri. "Herritarrek sinadura emateko mahaia otsailaren 14an jarri genuen lehen aldiz, eta hurrengo hitzordua otsailaren 28an izango da, 19:00etatik 20:00etara, Kalebarrenean".
"Martxa onean"
18 urtetik gorako pertsona guztiek sina dezakete Euskal Herriko Pentsiodunen Mugimenduaren lege proposamena, eta sustatzaileek aukera duten herritar guztiak gonbidatu dituzte horretara, "denen mesederako" izango delakoan. Batez ere, belaunaldi gazteenei egin diete deialdia. "Kontu honek denoi eragiten digu, ez soilik pentsiodunoi. Gazte asko ez dira sinatzera hurbiltzen, eta gogorarazi nahiko genieke eskatzen duguna eta lortu nahi duguna gure atzetik datozen belaunaldientzako ere badela".
Debako eta Itziarko pentsiodunak pozik daude deialdiak orain arte jaso duen erantzunarekin. Azaldu dutenez, 300 sinaduraren langa gaindituta, "martxa onean" doa bilketa. "Hasierako erronka 300 sinadura batzea zen. Beraz, kopurua gaindituta, pozik gaude taldean".
