Zehazki, bi hitzordu izango dira aukeran ostiralean (irailak 27). Zuhatza-Kolore Anitzek antolatu duen Euskal Makarroi Lehiaketak emango dio hasiera egitarauari; 17:30ean hasiko da, Plaza Zaharrean eta, bertan, aurrez izena eman duten LH1-LH6 bitartekoek parte hartu ahal izango dute. Bestetik, iluntzean, Kalean Kantuzekoen txanda izango da; 19:30ean irtengo dira kantuan.
Irailaren 28an, goizetik gauera arteko programazioa izango da. Eguneko lehen ekimena marmitako lehiaketa izango da, beste behin ere; Plaza Zaharrean jarriko dituzte partaideentzako mahaiak, 10:00etatik aurrera.
11:00etan, aldiz, Kalez Kale taldeko txistulariak irtengo dira kalera eta, 11:30ean, Zubietako joaldunek egingo dute kalejira. Dantzarako tartea ere egongo da; 12:00etatik aurrera, Gure Kai eta Musika Eskolako dantzari taldeko kideek girotuko dituzte herriko txokoak eta, 13:30ean, trikitilariek euskal musikaz eta bestelako doinuez beteko dituzte kaleak.
500 lagunetik gora
Aurreko urteotako dinamikari eutsita, Zuhatza elkartea arduratuko da Aldats pilotalekuan egingo den bazkari herrikoia antolatzeaz; 15:00etan izango da hitzordua eta bazkalostean musika eta jai giroa izango dira nagusi bertan, trikitilarien parte-hartzearekin. Besteak beste, gainera, Irrintzi Txapelketa ere egingo dute pilotalekuan, bigarrenez; arrakasta handia izan zuen iaz.
18:00etatik aurrera, buruhandiak ibiliko dira kalez kale eta ondorengo orduetan musika izango da protagonista. Lehenik, Que toque el de alao txaranga kalejiran irtengo da 19:00etan; gauean, berriz, Sukar taldearen erromeria izango da Foruen Plazan, 23:30ean.