Bihar, ostirala, EHAZE antzerkizale elkartearen eskutik, Maringurua: Karanbola Hirukoitza: Emakumeen Presentzia euskarazko antzerki sorkuntzan liburuan oinarritutako solasaldi parte-hartzaile eta performancea hartuko du Kultur Elkarteak, iluntzeko 19:00etan.
Bi asteburu hartuko dituen programazioaren hasiera baino ez da izango, ordea. Larunbaterako, Hiru kortse, azukre asko eta brandy gehiegi antzezlanaren emanaldia dago aurreikusita; Kamikaz Kolektiboak eta TTAK Teatroak eskainiko dute saioa, 19:30ean, zumardiko karpan. Igandean, berriz, emakume helduentzako antzerki hastapen tailer bat egingo da, Debako GOAZ antzerki taldearen eskutik, 10:00etan, jubilatuen egoitzan. Ondoren, 12:30ean, Metrokoadroka konpainiaren Andrezaharraren manifestua izango da, zumardiko karpan.
Datorren asteko asteburuan izango du jarraipena GOAZ antzerki taldea eta DIT feministaren ekimenez antolatutako festibalak.