Hiru eguneko irteera antolatu du Zuhatza-Kolore Anitzek maiatzeko zubirako

Erabiltzailearen aurpegia Berriketan 2025ko mar. 24a, 12:15

Parte hartu nahi dutenek gaurtik (martxoak 24) apirilaren 3ra bitartean egin ahal izango dute izen-ematea.

Askizuko aterpetxera hiru eguneko txangoa prestatzen dihardu Zuhatza-Kolore Anitz Aisialdi Taldeak. Irteera maiatzeko zubian izango da eta, oraingo honetan, "ekintza ugari, barre algarak, gaubelak eta beste hainbat jarduera" egiteko proposamena dakarte aisialdi taldeko begiraleek.

Zehaztu dutenez, maiatzaren 1ean goizean abiatuko dira Getaria aldera, eta hilaren 3an itzuliko dira Debara, bazkal aurretik.

Plaza mugatuak

Deialdia Lehen Hezkuntzako 4. mailatik 6. mailara bitarteko ikasleei zuzenduta dago, eta parte hartu nahi dutenek martxoaren 24tik apirilaren 3ra bitartean egin ahal izango dute izen-ematea, esteka honetan.

Gogorarazi dutenez, plaza mugatuak izango dira eta zozketa bidez esleituko dira. Era berean, irteera aurrera eramateko gutxieneko haur kopuru bat ezarriko dutela azaldu dute.