ELKARRIZKETA

"Eragile administratibo gisa sendotuz joan gara eta bistakoak dira egindako lanaren emaitzak"

Erabiltzailearen aurpegia Berriketan 2025ko ots. 27a, 11:43

Gaur (otsailak 27) betetzen dira hamar urte Itziarko Auzo Udala eratu zenetik. Urteurrenaren karietara, atzera begira jarri eta gaur egunera arte egindako bidearen balantzea egin dute Arantza Egaña auzo alkateak eta Zigor Gartziak. Denon Herria plataformako bi kideek gertutik bizi izan zuten auzo udalaren sorrera prozesua, baita gerora egindako bidea ere.

Hasiera "malkartsua" izan zuen arren, urte hauetan Itziarko Auzo Udala erakunde gisa "bere lekua hartzen" joan dela uste dute Zigor Gartziak eta Arantza Egañak. 2015az geroztik egindakoa baloratuz, egiteko dagoena ere aipatu dute elkarrizketan.

Nola baloratzen duzue hamar urteotako ibilbidea?

Zigor Gartzia: Begirada atzera botaz gero, eta izan zuen hasiera malkartsua kontuan izanda, prozesu ederra izan zela aitortu behar dugu. Oso bizia izan zen, eta uste dut bertan ibili ginen guztiok asko ikasi genuela eta ahalduntze prozesu bat ere egon dela herrian. Ibilbidea korapilatsua izan da, baina hari-mataza bezala askatzen ari da. Herri mugimendu indartsu baten ondoren, hasiera nahiko prekarioa izan zen, eta jauzi administratiboa gogorra izan da. Baina, era berean, uste dut aurrerapauso pila bat eman direla. Besteak beste, herritarren ahotsak eta beharrak entzuteko bada norbait, ahal den neurrian horiek konpontzeko ere bai, eta zerbitzuen arloan hobekuntzak nabariak izan direla esango nuke.

Garai hartan irudikatzen zenuten bezalakoa al da gaur egungo Itziar?

Arantza Egaña: Ez dakit irudikatzeko gai nintzen, baina gauzatu nahi genituen lan eta proiektu zehatz batzuk ikusteko gai banintzen behintzat; poliki-poliki badoaz gauzatzen haietako batzuk.

Zeintzuk?

A.E.: Betidanik amestu izan dugun Eskola Txikia datorren ikasturtean gauzatuko da. Zerbitzuen eta ikastaroen eskaintza ere hobetu nahi genuen, eta horretan eta beste hainbat kontutan ere bagabiltza. Ingurumenari dagokionean, aldiz, lurrak publiko egiteko eta biodibertsitateari lotutako proiektuak lantzeko itxaropenak geneuzkan, eta pixkanaka geldiezina den abiada hartu dutela uste dut.

"Oso prozesu bizia izan zen, eta uste dut bertan ibili ginen guztiok asko ikasi genuela eta ahalduntze prozesu bat ere egon dela herrian"

Zer aldatu da egunerokoan? 

A.E.: Hamar urte hauetan eragile administratibo gisa sendotuz joan gara eta bistakoak dira egindako lanaren emaitzak. Adibidez, administratiboki, zorionez, egonkortu egin da langileen prozesua. Izatez, Debako Udaleko teknikari guztiak Itziarko Auzo Udalekoak ere badira, baina Deba 6 kilometrora dago eta distantzia fisiko hori psikologikoa ere bada neurri batean. Beraz, lanaldi finko batzuekin diharduten hiru langile izatea aurrerapauso handi bat izan da Itziarko Auzo Udalarentzat, eta hori pasa den agintaldian sinatutako hitzarmenari esker lortu da.

Z.G.: Eguneroko bizitzan, herrian bertan dagoen giroa ere aldatu egin dela esango nuke. Orain ikastaro eskaintza zabala dugu, ludoteka, Gaztelekua, guraso elkarte langile bat... Horrek guztiak askotariko ekintzak ahalbidetzen ditu eta auzo udala horiek babesteko tenorean dago. Zorionez, Debako Udalarekin ere harremanak normaldu egin dira.

Nola irudikatzen duzue etorkizuna?

A.E.: Itziarrek herri txiki baten onurak eta ahulguneak ditu, baina beste askok ez bezala, industrialdea eta autopistarako sarrera ditu bertan. Eta horrek batzuetan arazoak sortzen badizkigu ere, etorkizunera begira ezin hobeto kokatuta gaude. Lortu edo lortzeko bidean diren gauzen artean, Itziarko Eskola Txikia herri proiektu eta erronka ederra litzateke, baina eskola umez bete beharra dago eta, beste hainbat lekutan bezalaxe, hemen ere etxebizitzen arazo larria dugu. Azken etxeak duela hamabost bat urte eraiki zituzten, eta herrian geratu nahi duten gazteak dauzkagu. Beraz, hurrengo urteetan, lanketa handia egin beharko dugu gure paisaia babestu eta etxebizitzaren arloan aurrerapausoak emateko.

Egitarau berezia prestatu duzue urtemugaren harira, ezta?

A.E.: Bai, urtemugaren eguna otsailaren 27a da, eta bezperan hasi eta asteburu osoa hartuko duen egitarau berezi bat ondu dugu. Ekitaldi nagusia martxoaren 2an izango da. Ospakizun egunak izatea nahi dugu eta, hortaz, herritar guztiak gonbidatuta daudela gogorarazi nahi genuke; haiek gabe hau guztia ez litzateke posible izango.


Auzo udalaren eratze ekitaldia 2015ean. Arg.: Ander Salegi