Etxebizitza bat eskuratzeko zailtasunak, jabetzan zein alokairuan, geroz eta ohikoagoak dira debarron ahotan. Ez da harritzekoa. Izan ere, etxebizitzen eta alokairuen prezioak gora eta gora doaz, soldatak 90. hamarkadatik ia igo gabe dauden bitartean. Datu ofizialen arabera Deban 600 etxe huts baino gehiago egon arren, etxebizitza bat eskuratzea zailduz doa dirudunak ez garenontzat.
Etxebizitza bat eskuratuz gero, hipotekak edo alokairuak soldataren gero eta zati handiagoa darama; geroz eta sektore gehiagoren pobreziarako joeraren erakusgarri. Bitartean, negoziorako aukera errentagarrienetako bat bilakatu da etxebizitza.
Etxebizitza negozio bermatzeko bidean doaz politikariek hartutako neurriak. Errentistei erraztasunak emanez (salbuespen fiskalak, laguntza publikoak, diru publikoa abaltzat erabiltzea...), sektorearen errentagarritasuna are gehiago handitzen ari dira. Alokatzeko erositako etxeak inbertsio bikainak dira, eta jabetza pilatzeko joeraren erakusgarri ere bai.
Epe ertain-luzera, arazoa handiagotu besterik ez da egingo. Arazoaren konponbidea etxebizitzaren auzia irabazien kontura kudeatzea da, langileon erabakitzeko gaitasuna handitzea, eta etxebizitzaren problematikaren hobekuntza beste sektore batzuetan murrizketak egitetik ez dadila etorri bermatzea (osasungintza, prestazio sozialak...).
Egoera honi aurre egiteko, apirilaren 5ean Donostian egingo den manifestaziorako deia egiten dugu Deba Bailarako Etxebizitza Sindikatutik; mobilizazioa Bulebarretik abiatuko da, 12:00etan. Aldi berean, eskerrak eman nahi dizkizuegu sindikatuak Deban antolaturiko ekintza ezberdinetara bertaratu zaretenoi.
Lanerako prestutasuna edota etxebizitzarekin arazoren bat edukiz gero, jarri harremanetan etxebizitza Sindikatuarekin! Harremanetarako telefonoa: 631331714
