Datorren ostegunean, apirilaren 10ean, etxean elikadura-ohitura osasungarriak sustatu nahi dituzten gurasoei zuzendutako doako hitzaldia eskainiko dute Deban, Treba Gurasoak programaren baitan. Saioa Kultur Elkartean izango da, 18:00etan, eta Mireia Centeno adituak gidatuko du.
Familia ingurunean elikadurarekiko jarrera arduratsuak sustatzeko gako praktikoak eskaintzea da Elikadura jarrera osasuntsuak izenburupean egingo den hitzaldiaren helburua. Hala, elikadurari loturiko alderdi desberdinak jorratuko dira, hala nola janariarekiko harreman emozionalaren gaia, helduek eredu gisa duten papera edota elikadura-ohituren inguruan giro positiboa sortzearen garrantzia.
Treba Gurasoak Gaztematikak eta Gipuzkoako Foru Aldundiak sustatutako prestakuntza-ekimena da eta haurren zein nerabeen gurasoei zuzenduta dago. Programa honen baitan, haur zein nerabeak hazteko eta hezteko garrantzitsuak diren gaiei buruzko doako hitzaldiak eskaintzen dira eta edukiak arlo psikosozialeko profesionalek ematen dituzte, herri bakoitzaren beharretara egokituta.
Debako Udalak herriko familia guztiak animatu nahi ditu saio honetan parte hartzera, gogoeta egiteko eta familia hezkuntzaren egunerokotasunerako tresna erabilgarriak barneratzeko.