Debako Udalak Gudarien plazatik Osio kaleko sarrerara arteko espaloietan dauden piboteak kentzeari ekin dio, eremuko segurtasuna hobetzeko helburuz. Pibote horien ordez, 111 baranda jarriko dira, eta horri esker, nabarmen hobetuko da Hondartza zein Maxpe kaleetako segurtasuna, bereziki oinezkoei dagokienean.
Era berean, egungo piboteak kentzean espaloietako mugikortasuna ere hobetuko da, "oinezkoak erosotasun handiagoz eta oztoporik gabe ibili ahal izango baitira bertatik".
Lanak astelehenean (martxoak 24) hasi ziren, eta hiru asteko iraupena izatea aurreikusi da. Baranda guztiak jarraian jarriko dira, 1,5 metroko tartearekin, betiere eremuko atari zein garajeetako sarrera-irteerak errespetatuz. "Aldaketa horri esker, espaloia eta errepidea modu egokiagoan bereiziko dira, oinezkoentzako ingurune seguruagoa eta erosoagoa bilakatuz".
32.655 euroko aurrekontua
32.655 euroko aurrekontuarekin, esku-hartzeak eremu horretako segurtasuna areagotzeko eta espaloietako mugikortasuna hobetzeko beharrari erantzuten dio, egunerokoan jende asko igarotzen baita bertatik. "Egungo piboteak, txikiak direnez, ez dute errepidearen eta espaloiaren arteko bereizketa eraginkorrik bermatzen, eta hori arriskutsua da inguruan oinez ibiltzen direnentzat. Horrez gain, piboteen altuera txikiak sarritan erorketak edo estropezuak eragin ditu. Baranda berriekin, udalak bereizketa nabarmenagoa eta sendoagoa egin nahi du, oinezkoak trafikotik babestuz eta espaloietako mugikortasuna hobetuz".