Debako Udalak lankidetza estua du Cita Alzheimer Fundazioarekin, udalerriko adinekoen osasun kognitiboa sustatzeko. Harreman horren baitan, 2024an, bi erakundeek, besteak beste, ExerCita programa abian jartzea ahalbidetzen duen hitzarmena berritu zuten. "Ekimen horren helburua da 60 urtetik gorako pertsonen eguneroko bizitzan funtsezkoak diren funtzio kognitiboak trebatzea, indartzea eta zaintzea".
Aipatzekoa da Deba aitzindaria dela Cita Alzheimer programan, ekimenak udalerrian baitu abiapuntua, beraz, aitzindaria da, baita ere, ExerCita programaren ezarketan. Aurten, programak izaera presentziala berreskuratuko du, eta parte-hartzaileei estimulazio kognitiboko ariketak taldean egiteko aukera eskainiko zaie, profesionalen zuzeneko laguntzarekin.
Saioen ezaugarriak
Deban eskainiko diren ExerCita saioak hamabost egunean behin egingo dira Arbil Elkarte Sozialean; ordu eta erdiko iraupena izango dute eta hamabost laguneko talde txikietan antolatuta eskainiko dira.
Azaldu dutenez, euskaraz zein gaztelaniaz egingo dira, parte-hartzaileen hizkuntza-ulermena bermatuz. Gainera, eskaeraren arabera, Itziarren talde propio bat egiteko ere aukera aurreikusten da.
Edizio honetako beste berrikuntza nagusietako bat material didaktikoaren eguneratzea da. Orain arte, programak bost maila eta horietako bakoitzeko bi liburuxka zituen. Aurten hirugarren liburuxka bat gehitu da, eta horrek aurreko edizioetan parte hartu dutenei berriro izena eman eta eduki berriekin lan egiteko aukera eskaintzen die.
Internet bidez ere izango du jarraipena programak, modalitate horretara egokitutako materialarekin.
Informazio saioa
Martxoaren 19an, programari buruzko xehetasunak emateko informazio bilera egingo da, 11:00etan, Arbil Elkarte Sozialean. "Bilera honetan programaren funtzionamendua, saioen ezaugarriak, izena emateko baldintzak eta ExerCitak osasun kognitiboari ekartzen dizkion onurak azalduko dira".