Hasi da Debako Zaintza Ekosistemaren bigarren fasea

Erabiltzailearen aurpegia Berriketan 2025ko mar. 12a, 09:28

Berrikuntza nagusi gisa, aurten, talde operatibo desberdinak gehitzeko proposamena jarri da mahai gainean, zaintza ikuspegi desberdinetatik aztertzeko, orain arteko lana osatzeko eta prozesuaren ikuspegi integrala bermatzeko. Helburu nagusia da udalerrian zaintza eredu partekatua sustatu eta errotzea, etorkizunean zaintza erantzukizun kolektiboa izan dadin.

Debako Zaintza Ekosistemak sendotze bidean aurrera egiten jarraitzen du eta orain bigarren fasearen lanketari ekin berri dio, Debako Udalak sustatuta eta Matia Fundazioaren gidaritzapean, beste behin. Prozesu honek zaintza erantzukizun kolektibo eta partekatu gisa ulertzen du eta, hortik abiatuta, helburu du udalerrian zaintza-eredu partekatua sustatu eta errotzea.

Iaz garatutako lehen fasean, talde eragileak ekosistema honen oinarriak ezarri zituen. Aipatu taldea alor desberdinetako profesionalek, udal arduradunek eta herritarrek osatu zuten. Egindako lanari esker, Debako zaintzaren egoerari buruz hausnartu ahal izan zuten, baita udalerrian behar den zaintza azpiegituraren oinarriak ezarri ere. Dena den, azpiegitura eraginkor bat definitzeko, beharrezkoa da zaintzaren kulturan aldaketa sakona egitea, inplikatutako eragileek eta pertsonek zaintza modu partekatuan ulertu eta onartu dezaten.

Ildo horretan, bigarren fase honek hasitako lanari jarraipena eta egonkortasuna ematea du helburu, Deban zaintza bizitzako oinarrizko elementu gisa sendotuz. Horretarako, talde eragilea mantenduko da, eta talde eragileari talde operatibo berriak gehitzeko proposamena jarri da mahai gainean, zaintza ikuspegi desberdinetatik aztertzeko eta orain arte egindako lana osatzeko.

Talde operatiboak: zaintzaren ikuspegi integral eta partekatua

Bigarren fase honen berrikuntza nagusietako bat talde operatiboen sorrera da. Hauek zaintzari buruzko hausnarketa eta koordinazioa egitea dute helburu, hainbat esparrutatik:

  • Talde soziosanitarioa: Talde hau, besteak beste, langile sanitarioek, gizarte zerbitzuetako profesionalek eta eguneko zentroko arduradunek eta beste agente batzuek osatuko dute, eta eragile soziosanitarioen arteko koordinazio-gune gisa funtzionatuko du.
  • Zerbitzuen taldea: Bertan parte hartuko dute, esaterako, etxez etxeko laguntza zerbitzuko (SAD) langileek, eguneko zentroko profesionalek eta zaintzari lotutako beste zerbitzu batzuek. Helburua Deban zaintza zerbitzuen antolaketa eta eskaintza hobetzeko hausnarketa egitea da.
  • Komunitate sarea: Sare hau zaintzarekin lotura zuzenik ez duten baina herri solidarioagoa eta erantzunkideagoa eraikitzeko funtsezko zeregina duten elkarte, talde eta erakundeek osatuko dute.
  • Zaintzaile afektiboen taldea: Senideak edo hurbileko pertsonak zaintzen dituztenen taldea da, esperientzia pertsonaletik abiatuta zaintzaren errealitatearen ikuspegia eskaintzeko.
  • Etxeko zaintzako profesionalak: Etxeko zaintzaren eremuan lan egiten dutenei zuzendutako taldea da, sektore horren beharrei eta hobekuntzei buruzko funtsezko ikuspegia emateko.

Talde eragilearen eta talde operatiboen arteko lotura estua izango da, izan ere, talde eragileko kide batzuek talde operatiboetan parte hartuko dute aktiboki, koordinazio eraginkorra eta prozesuaren ikuspegi integrala bermatzeko.

Horrez gain, Debako Udalak hainbat ekintza osagarri egingo ditu, hala nola udal langileentzako zaintza arloko prestakuntza eta gizarte zerbitzuekin lanketa espezifikoa.

Pertsonak ardatz dituen prozesu parte-hartzailea

Pertsonarengan Oinarritutako Arreta Ereduari (ACP) jarraituz, bigarren fase honek ikuspegi parte-hartzaileari eusten dio, erantzukidetasunean oinarritutako zaintzaren kultura sustatuz. Talde eragilea otsailaren 26an berraktibatu da, eta hemendik aurrera prozesua urtea amaitu bitarte garatuko da; talde eragilea bi hilean behin elkartuko da eta talde operatiboak, aldiz, hilero.

Fase hori amaitzean, herritarrei zuzendutako ekitaldi irekia egingo da, azken hilabeteetan lortutako aurrerapenak eta egindako lana aurkezteko.

Ikuspegi kolaboratibo eta aurrerakoi honekin, Debako Zaintza Ekosistemak bere helburua egikaritzeko bidean aurrera egiten jarraitzen du: zaintza eredu sendo, partekatu eta errotua eraikitzea udalerrian, herritarren beharrei modu eraginkorrean erantzuteko.