Otsailean ospatutako ohiko osoko bilkuran, Debako Udaleko udalbaltzak onespena eman zion Udalaren eta Debegesaren arteko lankidetza hitzarmenari. Honen bitartez, Udalak, pasealeku estalia hobetzeko proiektuaren kudeaketa zuzena bere gain hartzen du. Proiektu hau Euskal Kostaldeko UNESCO Geoparkearen Helmugan Jasangarritasun Turistikoko Planaren baitan jasotzen da, eta Europako Next Generation EU programaren bitartez finantzatzen da.
Orain arte, eskualdean Europako Next Generation EU funtsen bidez finantzatutako proiektuak Debegesak kudeatu ditu. Hitzarmen hau sinatuta, baina, Debako Udalak bere gain hartzen du herrirako funtsezkoa den proiektu honen gidaritza, udalerriaren beharrei erantzuteko kudeaketa zuzenagoa bermatuz. Next Generation EU funtsen baitan jasotako gainerako proiektuak Debegesak kudeatuko ditu, orain arte bezala.
Pasealeku estalia hobetzeko proiektua
Orain, proiektu horren kudeaketa lortu ondoren, Udalak pasealeku estalia osotasunean hobetzea aurreikusten du. Horretarako, lehenik eta behin beharrezko egitura-hobekuntzak egingo ditu pasealeku estalian, herriko gune enblematiko hori zaindu eta egokitzeko.
Paseo estalia hobetzeko proiektua udalerriko jasangarritasunaren eta garapen turistikoaren estrategiaren baitan kokatzen da, tokiko merkataritza sustatzeko eta herriko espazioak hobetzeko, debarren zein bisitarien onurarako.
Debarako inbertsio gehiago Next Generation EU funtsekin
Paseo estalia hobetzeaz gain, Next Generation EU Europako funtsekin finantzatutako beste hainbat proiektu estrategiko ere gauzatuko dira Deban, besteak beste:
• Gudarien Plaza oinezko egitea; udalerriaren erdigunean mugikortasun jasangarria eta irisgarritasuna hobetzeko.
• Kanalako bidea birgaitzea; esku-hartze horri esker, ibilbide garrantzitsu hori berreskuratu eta egokitu ahal izango da.
• HABerako bigarren fasea.
• Argindar-koadroak berritzea udalerriko hainbat eremutan; proiektu hau lizitazio-fasean dago eta laster hasiko da.