Debako Udalak Gazte Artista Bisual Berriak Sustatzeko Sariaren 2025. ediziorako deialdia zabaldu du. Ekimena sortu zenetik, sari honek ikusizko-arteen esparruan euskal artista garaikide berrien sustapena eta zabalkundea ditu oinarri.
Arte Eskola Bizirik kolektiboarekin elkarlanean antolatuta, deialdiaren helburua da Euskal Herrian sortzen ari diren artistei ikusgarritasuna eta babesa ematea. Izan ere, artista horiek askotan zailtasunak izaten dituzte beren lana jendaurrean erakusteko eta finantzazioa lortzeko. Hori dela eta, urtez urte, sari honen bitartez, "Debak kulturarekin eta sormenarekin duen konpromisoa indartzen du", eta Udalak Santa Maria elizako klaustroa eskaintzen die gazteei, beren lan artistikoak erakusteko eta beren ibilbidea bultzatzeko espazio gisa.
Debako alkate Alazne Txurrukak adierazi bezala, "sari hau gazteen eta kulturaren aldeko apustu irmoa da. Izan ere, gure artista berrientzat ikusgarritasun-guneak sortzeko premia horretan irmoki sinesten dugu eta horregatik, sari honen bidez, sortzaile gazteei beren talentua ingurune paregabe batean erakusteko aukera eskaintzen diegu, beren lana sustatuz eta, aldi berean, gure udalerriko ehun kultural eta artistikoa aberastuz”.
Sortzen ari diren artista berrientzat aukera
Lehiaketa Euskal Herrian jaio edo bizi diren 35 urtetik beherako artista guztiei zuzenduta dago. Banaka edo gehienez lau kideko taldeetan parte hartu ahal izango da.
Deialdiak ikusizko arteei loturiko modalitate desberdinak hartzen ditu barne, esate baterako:
- Pintura: edozein teknika piktorikotan egindako lanak (oleoa, akrilikoa, akuarela, etab.).
- Eskultura: hiru dimentsioko sorkuntzak material desberdinetan (zura, harria, metala, zeramika, etab.), betiere klaustroaren mugak errespetatuz (pisua, tamaina…).
- Instalazio artistikoa: elementu eskultorikoak, soinudunak, argiak edo digitalak konbinatu ditzaketen eta erakusketa-espazioarekin elkar-eragiten duten obrak.
- Formatu hibridoak: hainbat diziplina artistiko uztartzen dituzten proiektuak, hala nola argazkigintza esku-hartze piktorikoarekin, eskultura bideo-artearekin, ehun-artea elementu digitalekin…
Proposamenak formatu digitalean (PDF) aurkeztu beharko dira eta aurkezten den dosierrak ondorengo informazioa jaso beharko du: proiektuaren deskribapen zehatza, obren irudiak (15 irudi banakako proposamenetarako eta 20 taldeentzako) eta artistaren edo kolektiboaren curriculuma.
Saria 4.000 eurokoa da eta lan irabazlea Santa Maria elizako klaustroan egongo da ikusgai uztailean eta abuztuan.
Proposamenak aurkezteko epeak
Interesdunek posta elektronikoz soilik bidali ahal izango dituzte eskabideak, maiatzaren 15a bitarte, kultura@deba.eus helbidera.
Epaimahaia arte adituek eta udal ordezkariek osatuko dute, eta proposamenen kalitatea, originaltasuna eta kultur-interesa baloratuko ditu, baita hautagaien ibilbidea eta prestakuntza ere. Horrez gain, kontuan hartuko ditu artistaren adina, eskatutako arlo artistikoan izandako prestakuntza eta esperientzia edota euskararen ezagutza.
Ebazpena publikoki jakinaraziko da erakusketa hasi baino hilabete lehenago.