Debako Udalak sukaldaritza tailer berezi bat antolatu du datozen asteotarako, Gipuzkoako Foru Aldundiarekin eta CEBANC-ekin elkarlanean. Azaldu dutenez, ikastaroaren bitartez, herritarrak "0 alferrik galtzea" filosofiaren garrantziaz kontzientziatzea nahi da eta, horretarako, elikagaien soberakinak modu eraginkor eta sortzailean aprobetxatzen irakatsiko da.
"Ekimen honen helburua da, beraz, eguneroko bizimoduan hondakin gutxiago sortzeko ohitura onak sustatzea eta elikadura jasangarriago baten alde urratsak ematea", adierazi dute.
Tailerraren xehetasunak
Tailerra euskaraz eskainiko da eta guztiz doakoa izango da. Martxoaren 3tik apirilaren 9ra egingo da eta saioak astean bitan izango dira, Ozio-Bide elkartean. Zehazki, astelehenetan eta asteazkenetan izango dira saioak, 17:00etatik 19:30era.
Parte hartzeko interesa dutenek Debako turismoan bulegoan edo 943 19 24 52 telefonora deituta izena eman dezakete; ostirala (otsailak 14) da horretarako azken eguna.
Iragarri dutenez, bertan parte hartzeko hainbat baldintza bete beharko dira. Honakoak:
- Parte hartzeko, 16 urtetik gorakoa izan, Deban erroldatuta egon eta saioen %80ra joateko konpromisoa hartu behar da.
- Taldea, berriz, 8 eta 15 lagun artekoa izango da, eta parte-hartzaileak zozketa bidez hautatuko dira. Plaza lortzen ez dutenentzat itxaron-zerrenda osatuko da.