Sortzez bilbotarra izan arren, Debarekin lotura estua izan zuen txikitatik Enrique Vitoriak (Kike Turmix ezizenez ezagunagoa). Debako danborradako zuzendari izandako Isidro Vitoria Miami-ren semea eta Txema Vitoriaren anaia izateagatik ezagutzen zuten askok inguruotan, baina 80ko eta 90eko hamarkadetan punk-rock musikari gisa egindako ibilbideak nazioarteko ospea eman zion.
Musikaren hainbat eremutan aritu zen: Kike Turmix y los pasapures, N-634 eta Pleasure Fuckers taldeetako abeslaria izan zen, adibidez, baita disko jartzailea, Safety Pin Records zigilu diskografikoaren sortzailea, kontzertu-bira antolatzailea… ere. Ospe handia izan zuen, besteak beste, Eskandinaviako rock musikarien artean ere, eta Orange Productions ekoizpen-etxeak bere bizitzari buruzko dokumentala kaleratu zuen 2005ean; goikaldean duzue ikusgai (azpitituluak ditu ingelesez). Deban grabatutako irudiak agertzen dira bertan. Urriaren 17an bete zen bere heriotzaren 19. urteurrena.