Mogel guraso elkartearen eskutik eta Altxa Burua Deba-Itziar taldearen babesarekin, hurrengo apirilaren 9an, asteazkenean, Iñaki Zubizarretak Mendatako ikasleentzat hitzaldi bat emango du institutuan. Arratsaldean gurasoentzat ariko da; batik bat DHko gurasoei zuzendutako saioa emango du, baina interesa duten guztientzat irekia egongo da saioa. Hitzordua Kultur Elkartean izango da, 18:00etan. Ohartarazi dutenez, ez da gomendagarria adin txikikoak bertaratzea.
Luzaro ikastetxearen eskutik, apirilaren 10ean, ostegunean, LH5eko eta LH6ko ikasleei zuzendutako beste hitzaldi bat emango du, eskola orduetan. Arratsalde horretan bertan, LH6ko gurasoentzat hitzaldia emango du Luzaro eskolako Agirretxeko eraikinean, 18:00etan.
Iñaki Zubizarreta saskibaloiko jokalari ohia da eta dibulgatzaile, hizlari eta ekintzaile gisa lan egiten du, eskola-jazarpena eta ikasgeletako indarkeria hautemateko eta prebenitzeko helburuz.
Bere bizipen pertsonaletan oinarrituz, bere historia ezagutarazteko helburuz jarduten du Zubizarretak, "gertaturikoak errepikatu ez daitezen eta beste inork jasan ez ditzan. Gizartea isilik ez egotearen eta edozein indarkeria mota salatzearen garrantziaz kontzientziatzen saiatzen da".
Zubizarretak hitzaldiak eta formakuntza saioak ematen ditu ikastetxeetan, eskola-jazarpena desagerrarazteko helburuarekin. Saioak haurrei eta helduei zuzenduak egoten dira, eta garrantzitsua da oso bullyingaren eta ziberbullyngaren prebentzioan eta haren aurkako borrokan egiten duen ekarpena.