Atzo (martxoak 16) egin zuten norbanakoek izena emateko epearen irekiera ekitaldia, Debako Plaza Zaharrean. Euskal Herri osoko ahobizi eta belarriprest-ek euskararen erabilera sustatzeko egitasmo erraldoian parte hartzeko izena eman dezakete jadanik, Euskaraldiaren webgunean.
Dozenaka herritar egon ziren ekitaldian, baita udal ordezkari batzuk ere. Euskaraldiaren nondik norakoak azaldu zituzten, eta bertsoz eta musikaz girotu zuten agerraldia. Gainera, aurrez iragarri bezala, Euskaraldiaren Debako hamaikakoa ere aurkeztu zuten jendaurrean. Euskaraldiak hamaika enbaxadore hauek izango ditu herrian ekimena hauspotu eta herritarren parte-hartzea sustatzeko: Laura Solozabal, Igotz Alcorta, Irati Majoral, Ralph Horton, Edyta Koronczewska, Ianire Garate, Paul Garcia, Juanma Iparragirre, Kontxi Basterretxea, Fernando Urain eta Olatz Arriola.