Bihar zabalduko dute norbanakoek Euskaraldian izena emateko epea, euskararen aldeko ariketa kolektiboa ofizialki hasteko bi hilabete falta direnean. Eta Deban izen-ematearen irekiera ekitaldia antolatu dute etzirako, martxoaren 16rako. 12:00etan izango da hitzordua, Plaza Zaharrean, eta herri batzordeko kideek bertaratzeko deia egin diete herritarrei, "maiatzera bitartean egingo dugun bideari elkarrekin emateko hasiera".
Elkar mugituz egingo dugu lelopean maiatzaren 15etik 25era egingo den egitasmoari buruzko informazioa ematearekin batera, ekitaldian Euskaraldiaren Debako hamaikakoa ere aurkeztuko dute. Hamaika herritar horiek enbaxadore lanak egingo dituzte, ekimena hauspotu eta herritarren parte-hartzea sustatzeko ardura izango baitute.