Umorea eta musika. Horiek dira Kultur Elkarteak martxoko egitarauan aurreikusitako bi ikuskizunen osagai nagusiak.
Bihar (martxoak 21) stand up probalekuaren saio berri bat egingo dute, 20:00etan. Umoregile hasi berriak eta esperientziadun bakarrizketariak ariko dira Barretegian; Eñaut Zuazok, Antton Telleriak, Manex Astigarragak, Lide Arregik eta Markel Ramosek parte hartuko dute ikuskizunean.
Hilaren 29an, aldiz, Ruper Ordorika eta Arkaitz Miner musikarien kontzertua izango da. Ordorika Deban izan zen 2023ko apirilean ere, eta bakarka aritu zen Kultur Elkartean eskainitako bi emanaldietan. Oraingoan, ordea, Mugalaris proiektuan taldekide duen Miner (biolina, mandolina, gitarra...) izango du ondoan. Ordorikaren diskografia osoaren errepasoa egingo dute zuzenekoan (20:00etan).
Aipatutako bi hitzorduetarako sarrerak agortuta daude.