Debako Gazte Asanbladako kideek jakinarazi dute Valentzia astindu duen hondamendian kaltetutakoei laguntzeko material bilketa egingo dutela igandean. Langileen bizitzen gainetik irabaziak jarri dituzten enpresariak seinala ditzagun lelopean iragarri dute material bilketa. "Elkartasun osoa bidali nahi diogu Valentziako langileriari, eta ezbehar honetan enpresariek izan duten papera gogor salatzen dugu", nabarmendu dute.
Foruen Plazan (udaletxe azpiko arkupeetan) jasoko dute materiala, 11:00etatik 14:00etara bitartean. Zehaztu dutenez, ez da arroparik behar, baina arropa bidaltzekotan katiuskak batuko dituzte. Osterantzean, honako produktu hauek bildu nahi dituzte: maskarillak, eskularruak, gel hidroalkoholikoa, garbiketarako produktuak, higiene produktuak (txanpua, gela, xaboia, hortzetako eskuilak eta pasta, konpresak, tanpoiak...), pixoihalak eta umeentzako produktuak, sendagaiak, zeliakoentzat eta dieta berezia daramatenentzako janaria, animalientzako janaria, ur-ponpak, zabor poltsa handiak, mantak eta lo-zakuak, mailuak, palankak...