Martxoan egin bezalaxe, Arbil Elkarte Sozialak askotariko jarduerak antolatu ditu apirilerako ere. Bihar (apirilak 3), esaterako, Edadekoak bai, zaharrak ez izenburua daraman hitzaldia izango da, 11:00etan, Arbil Elkarte Sozialean bertan. Solasaldira bertaratzeko deia egin diete herritarrei.
Jose Agustin Arrieta arduratuko da hitzaldia emateaz eta, Arbileko kideek aurreratu dutenez, gai interesgarriei helduko die gonbidatuak. "Gaur egun, erretiroa ez da bizitzaren amaiera, etapa berri bat bizitzeko aukera paregabea baizik. Lehen, erretiroaren ondorengo bizi-itxaropena 10 edo 15 urtekoa izan zitekeen; orain, berriz, 30 urtekoa edo gehiagokoa ere izan daiteke".
Azpimarratu dutenez, "denbora hori nola aprobetxatu erabakitzea da gakoa". "Errutinak harrapatzen bagaitu, zahar bihurtzeko arriskua dugu. Aldiz, norabidea geuk hartzen badugu, helburuak finkatzen baditugu eta aktibo mantentzen bagara, bizitzako etapa aberasgarrienetako bat bihur dezakegu".
Gaineratu dutenez, helburu horiek guztiak lortzeko "funtsezkoa da ikasten jarraitzea, gizarte-harremanak zaintzea, gorputza eta burua lantzea eta jarrera positiboa izatea".