Amaitu da Gipuzkoako Herri Txikietako Areto Futbol Liga. Antolatzaileek jakinarazi dutenez, Bidania-Goiatzek irabazi du lehia. "Liga ezin hobea egin du, gainerakoak baino koska bat gorago dagoela erakutsiz".
Bigarren postua lortzeko lehia estua izan dela azpimarratu dute txapelketaren antolatzaileek, baina, azkenean, Itziarko taldearentzat izan da "ohore" hori. Leaburu-Txarama eta Ikaztegietako Kuturru taldeak geratu dira, hurrenez hurren, atzetik, eta bigarren postua lortzeko hiru talde horien arteko aldeak "txikiak" izan direla zehaztu dute. Sailkapena, azkenik, Itsasondoko Ijito taldeak itxi du.
Laster hasiko da Gipuzkoako Herri Txikietako Areto Futbol Kopa eta, iragarri dutenez, Itziarrek A taldean jokatuko du. "Sailkapeneko lehen lau sailkatuek parte hartuko dute bertan". Aurrerago emango dituzte txapelketa berriari buruzko xehetasun gehiago.