10:00etan plazan elkartu eta mendi irteerarekin emango diote hasiera Kardantxulo Egunari. Aurreratu dutenez, bi ordu inguruko buelta emango dute. 13:00etan, gazteak poteoan irtengo dira Kalebarrenetik. Beti bezala, mozorrotuta irtengo dira kalera; aurten, 'Jostailuak' da mozorrotzeko aukeratu duten gaia.
14:30ean, Gure lurrekin negoziorik ez pankarta pintaketari ekingo diote. Azaldu dutenez, Mendatagainean eta flyschean egindako hartxintxar bideen harira egin nahi dute salaketa. "Ekintza honekin, lurraren eraldaketa honek gugan izan duen eragina salatu nahi dugu. Itziartar bezala, betidanik bisitatu izan ditugu flysch inguruak. Txoko hauek eta bertako bideak eraldatu izanak ustekabean harrapatu gaitu. Hori gutxi balitz bezala, ez dituzte gure bideak errespetatu eta aldaketa hauek egitean, kanpoko bisitariak gure gainetik jarri dituzten sentsazioa dugu. Baina beharbada hau da gaur egungo errealitatea".
Hausnarketa horren ondoren, herri bazkaria egingo dute frontoian. 17:00etan kontzertu akustikoa izango da Burugorrin (Malen eta Nagore), eta Latuna Bando Txaranga kalez kale arituko da 19:00etatik aurrera. Eguna biribiltzeko, gauerdian, karaokea antolatu dute Burugorrin.