Itziarko Auzo Udalak festa giroan ospatu du 10. urteurrena

Berriketan 2025ko mar. 3a, 12:30

Itziarko Auzo Udala sortu zela hamar urte bete ziren aurreko ostegunean (otsailak 27), eta hori ospatzeko ekitaldi berezia egin zuten atzo (martxoak 2), Itziarko plazan jarritako karpan.

Jende andana gerturatu zen atzoko ekitaldira; herritarrak ez ezik, bertan izan ziren bestelako eragile eta ordezkari batzuk ere, hala nola Eider Mendoza diputatu nagusia, Alazne Txurruka Debako alkatea, Ereñotzuko auzo udaleko kideak eta hemendik gutxira auzo udal bihurtuko den Igeldoko kideak. 

11:30ean hasi zen ekitaldia eta lehendabizi harrera egin zitzaien herriko plazara bertaratu ziren guztiei; Kattalin Zubizarreta eta Ane Sarasua musikariek girotu zuten unea. 12:00ak bueltan hasi zen Mikel Arrizabalagak gidatutako ekitaldi instituzionala eta, bertaratutakoei ongietorria eman ondoren, Andutz dantza taldeko dantzariak aritu ziren oholtzan.

Alazne Txurruka: "Gaur egun, Itziarren eta Debaren arteko harremana ez da bi errealitate bereizirena"

Ondoren, Alazne Txurruka Debako alkateak hartu zuen hitza. Azpimarratu zuen atzokoa egun "berezia" zela itziartarrentzat, baita debarrentzat ere. "Duela hamar urte auzo udal gisa hasi zuen bere ibilbidea Itziarrek eta hasiera gorabeheratsua izan zen arren, hamar urteotan ezberdintasunak alde batera utzi eta elkarrekin bidea egiteko aukera izan dugu, helburu bakar bati helduta: gure bizilagunen ongizatearen alde lan egitea".

Lankidetzaren garrantzia ere nabarmendu zuen. "Hamarkada honetan elkar ulertzeko eta lankidetzan aritzeko bide bat eraiki dugu. Eta onuragarria izan da guztiontzat. Gaur egun, Itziarren eta Debaren arteko harremana ez da bi errealitate bereizirena, eta elkar lagundu, babestu eta aberasten dugula esan dezakegu. Hamar urte hauek elkarlana oinarri izango duen ibilbide luze baten hasiera baino ez dira. Aurrerantzean ere Deba zein Itziarren etorkizuna elkarrekin, ilusioz eta erabakitasunez ehuntzen jarraitu dezagun".

Andutz dantza taldekoko kideak oholtzan.
 

Eider Mendoza diputatu nagusiak, berriz, "etorkizunari ilusioz beterik heltzen dion" komunitatearen irudian jarri nahi izan zuen azpimarra. "Gure komunitatean balio oso handiak daude, eta hemen ikusten ditugu. Batetik, euskara, gainontzeko euskal hiztunekin eta gainontzeko euskal lurraldeekin batzen gaituena. Bestetik, gure izaera propioa, gure kultura, hemen ere nabarmen ikusten dena, eta batik bat elkarlana, gaurkoan hemen oso argi gelditzen dena".

Arantza Egaña: "Hemen gaur hainbeste herritar elkartzea eta auzo udala babestea da hamar urteko ibilbidearen adierazlerik onena".

Itziarko Auzo Udala zoriontzeko tartea ere hartu zuen diputatu nagusiak. "Gaurkoa jai eguna da, eta nik benetan bihotz-bihotzez opa dizuet hemendik aurrera ibilbide honetan asmatzen jakitea elkarri eutsita".

Azkenik, hamar urte hauetan guztietan bizitakoa laburbildu zuen Arantza Egaña auzo alkateak. "Hemen gaur hainbeste herritar elkartzea eta auzo udala babestea da hamar urteko ibilbidearen adierazlerik onena". Baina, horretarako, "iragan zaila" ere ekarri behar izan zuen gogora. "Urduritasuna eta zalantza zen nagusi orduan, hainbat gaizki ulertu eta ika-mika eragin zituen auzo udalaren prozesu korapilatsuak, eta nora iritsi zitekeen ere ez zegoen hain garbi".

Arientzako kanpai-jole eskolako kideak.
 

Ibilbide horretan emandako urrats garrantzitsuei buruz ere aritu zen Egaña. "Hemen dauden eta ez dauden askoren bulkada behar izan du auzo udalak, amesten genuen hori posible zela erakusteko. Denbora honetan, eragile administratibo gisa sendotuz joan da eta bistakoak dira egindako lanaren emaitzak. Itziarko Auzo Udalaren erronka nagusia izan da eragile administratibo gisa duen funtzioa antolaketa herritarrarekin bateratzea. Nabarmenak dira aurrerapausoak eta pixkanaka emandako urratsak azpimarratzen hasita, goraipatzekoa da aurreko agintaldian erdietsitako hitzarmena Debako Udalaren eta Itziarko Auzo Udalaren artean, erakundeen arteko egungo aitortza eta lankidetzaren oinarri".

Etorkizuneko erronkez ere mintzatu zen auzo alkatea. Aipatu zuenez, kontzeju etxe zaharra berritzen ari dira, bertan Eskola Txikia izango denaren gela berriak egokitzeko. "Laster Itziarren ere Eskola Txikia izango dugu; oso harro gaude lorpen hortaz ere. Hemendik gutxira, gainera, ikerketa sozioekonomiko bat ere abiatuko dugu. Hauxe izango da aurtengo ahalegin nagusia, hamar urteko ibilbidearen perspektibatik".

Egañaren hitzen ondotik, mokadu bat jan eta eztarriak bustitzeko aukera ere izan zuten bertan bildu zirenek. Ekitaldia biribiltzeko, Arientzako kanpai-jole eskolako kideen kontzertu bereziaz gozatzeko aukera izan zen.