Eguraldi ona eta epela lagun, zuhaitz landaketa egin zuten aurreko igandean (otsailak 23) Itziarren. Itziarko Auzo Udalaren, Lizarbe Guraso Elkartearen, Itziarko Gazte Asanbladaren, Lasturko Mendi Martxaren eta Gainez Gain taldearen ekimenez egin zen jarduera, eta pozik agertu dira parte hartzearekin. Azaldu dutenez, 40 bat boluntariok, ume zein helduk, parte hartu zuten bertan.
Ekintzan parte hartu zuten boluntarioak industrialdeko sarreran kokaturik dagoen Ayra Cardan enpresaren parean elkartu ziren 09:00etan eta, handik, Andutzko magalera abiatu ziren, aitzurrak eta beharrezko lanabesak eskuetan.
12:45ak aldera arte iraun zuten lanek eta tarte horretan, bertoko 500 zuhaitz espezie landatu zituztela aipatu dute: arteak, ehiar frantsesak, gorostiak, gartxuak, basaranak, elorriak, hostazuriak, otsolizarrak, basagurbeak, ezki hosto-txikiak, marmaratilak... "Horiei gero tutuak eta zutoinak ipini genizkien, gogortu bitartean babesa izateko".
Lanean gogoz jardun ondoren, Burugorri ostatuan batu ziren guztiak mokadu baten bueltan.