2015eko otsailaren 27an jarri zen martxan Itziarko Auzo Udala, bere izaera zehazten duen Foru Dekretuak onespena jaso ondoren. Hamar urte igaro dira harrezkero, eta urtemuga biribila ospatzeko egitarau berezia antolatu dute.
Iragarri dutenez, martxoaren 2an izango da urteurren ekitaldi nagusia, baina, aurretik, bestelako proposamenak ere prestatu dituzte. Gaur (otsailak 26), esaterako, Aran Santamaria artista zumaiarrak Burugorri Ostatuko hormetan jarriko duen collage erakusketa inauguratuko dute eta bihar (otsailak 27), berriz, Patxi Bisquert aktore eta zuzendariak auzolanean ekoiztu duen Ombuaren itzala filma proiektatuko dute Lasturko elizan. "Zuzendaria bertan izango da, eta solasaldia egingo dute bukaeran".
Etzi (otsailak 28), aldiz, Andoni Egaña eta Maialen Lujanbiorekin bertso afaria izango da Bikain jatetxean. Sarrerak 25 euroan jarri dituzte salgai eta interesa dutenek jatetxean bertan edo harrera bulegoan izango dituzte eskuragarri. Itziarko Larrabehi Elkarteko ekimenez, bestalde, sokamuturra izango da larunbatean (martxoak 1), 16:30ean, Kalebarrenean.
"Ospakizunerako eguna"
Oroitza ospakizun nagusia, berriz, igandean (martxoan 2) burutuko da, herriko plazan atondutako karpa estalian.11:30ean jarri dute hitzordua eta, bertan, urte hauetan bidelagun izandako erakunde, eragile, lankide, ordezkariak eta beste auzo udaletako arduradunei harrera egingo zaie, musikak lagunduta. Ondoren, dantza ikuskizuna eskainiko dute aurten hamar urte bete dituzten Itziarko umeek.
12:00etan, Alazne Txurruka Debako alkateak, Eider Mendoza Gipuzkoako ahaldun nagusiak eta Arantza Egaña Itziarko Auzo Udaleko alkateak parte hartuko duten ekitaldi instituzionala izango da. Ekitaldia biribiltzeko, luntxa izango da bertaratuentzat eta, nahi duenak, hagin landare bat opari eramateko aukera ere izango du.
Ekitaldiaren amaieran, 13:15ean, kanpai kontzertua izango da, Arientzako kanpai-jole eskolako kideen eskutik. Itziarko kanpandorreko kanpaiak erabiliz hainbat pieza joko dituzte, garai bateko kanpai-jole ofizioan oinarrituta eta herri ezberdinetako tradiziotik jasoak, gaur eguneko ikuspegi berritzailetik arituz.
Herritar guztiak igandeko ekitaldira gonbidatuta daudela azpimarratu du Arantza Egaña auzo udaleko alkateak. "Ekitaldiaren izaera instituzionalaren gainetik, ospakizunerako egun eder bat bilakatzea nahi dugu, herritar guztiak daude gonbidatuta, batez ere, herritarren gogo, borondate, aldarrikapen eta esfortzu nekaezina izan baitira Itziar Auzo Udal bilakatzea posible egin dutenak", adierazi du.
Ikerketa sozioekonomikoa
Jakinarazi dutenez, dena ez da ospakizuna izango. Hamarkada bateko
perspektiba baliatuz, lehendik iragarria zuten ikerketa sozioekonomikoa burutuko dute udaberritik aurrera. Horixe izango dute, hain zuzen ere, urteko egitasmo nagusia.
Iragarri dutenez, hiru partetan burutuko dute ikerketa. Informazio zuzenaren bilketa gauzatuko dute lehenik, udaberrian. Eta herritarren eskutik informazio bilketa eta bestelako datu iturrietatik jasotako landa-lan osoa egin eta gero, egoera sozioekonomikoari buruzko diagnostikoa jorratuko du horretarako kontratatutako ikerketaren aditu taldeak udan. Azterketaren emaitzak eta ondorioak, azkenik, udazkenean aurkeztuko dituzte.
EGITARAUA
- Otsailak 26, asteazkena
- 19:00. Aran Santamaria artistak collage erara egindako sorkuntza artistikoaren inaugurazio ekitaldia, Burugorri ostatuan. Martxoaren 30era arte egongo da ikusgai lana.
- Otsailak 27, osteguna
- 18:30. Ombuaren itzala filmaren proiekzioa, Lasturko elizan. Ondoren, solasaldia izango da Patxi Bisquert filmaren zuzendariarekin.
- Otsailak 28, ostirala
- 21:00. Andoni Egañarekin eta Maialen Lujanbiorekin bertso afaria, Bikain jatetxean.
- Martxoak 1, larunbata
- 16:30. Sokamuturra, Kalebarrenean.
- Martxoak 2, igandea. Urteurren ekitaldia
- 11:30. Harrera, Kattalin Zubizarreta eta Ane Sarasua musikariek girotuta, herriko plazan.
- 12:00. Ekitaldi ofiziala eta ordezkarien agerraldia.
- 12:30. Luntxa.
- Ondoren. Hagin landare bat banatuko zaie bertaratutako herritar denei.
- 13:15. Kanpai kontzertua, Arientzako kanpai-jole eskolaren eskutik.