Burugorri Martxan eta Lizarbe Guraso Elkarteak antolatuta, inauteriak ospatzeko festa berezia izango da datorren ostiralean (otsailak 28), Itziarko Zabalsoro frontoian. 16:30ean emango diote hasiera ospakizunari eta, urtero bezala, norberak etxetik eramandako jakiekin osatutako askari baten bueltan batuko dira herritarrak. Mokadua jan ondoren, buruhandiekin jolasean aritzeko tartea izango da.
18:00etan, amaitzeko, mozorro showa izango da. Antolatzaileek iragarri dutenez, banaka, binaka zein taldeka parte hartu ahal izango da ikuskizunean eta, zehaztu dutenez, "proposamen guztiak" onartuko dituzte, hala nola, koreografiak, antzezlanak edo playback saioak.
Izen-ematea
Mozorro showean parte hartu nahi dutenek aurrez izena eman beharko dute. Horretarako, nahikoa da Itziarko ludotekara gerturatzea edo 630 66 88 57 telefono zenbakira deitzea edo idaztea. Gogorarazi dutenez, gaur (otsailak 24) da izena emateko azken eguna.
Nahi dutenek, gainera, showa prestatzeko lekua eta laguntza izango dutela esan dute. Horretarako aukera astelehen eta ostegunetan egongo da ludotekan.