Aurten ere, zuhaitz landaketa antolatu dute Itziarko eragile ezberdinek auzolanean. Igande (otsailak 23) goizean izango da jarduera eta azaldu dutenez, Andutzko parajean egingo dute landaketa, iazko eremuaren segidan. "Elutzetako elurzulotik gora dagoen pendizean egingo da zuhaitz landaketa", zehaztu dute.
Bertan parte hartu nahi dutenek hitzordua jarrita daukate: 09:00etan batuko dira Itziarko Enpresa Parkeko sarreran kokaturik dagoen Ayra Cardan fabrikaren parean, eta handik Andutzera abiatuko dira aitzurrak eta landatuko dituzten zuhaixkak beraiekin daramatzatela.
Itziarko Auzo Udaleko iturriek iragarri dutenez, eremuaren lur jabeekin tratua egin ondoren, 500 bat zuhaitz eta zuhaizka landatuko dituzte bertan. Gehienbat artea landatuko dute eta, horrekin batera, bestelako espezie batzuk ere, honakoak: ehiar frantsesa, gorostia, gartxua, basarana, elorria, hostazuria, otsolizarra, basagurbea, ezki hosto-txikia eta marmaratila.
Izen-ematea eta gomendioak
Ekintza 14 urtetik gorakoei gomendatua dago, baina gazteagoak gurasoen ardurapean ibili ahalko direla esan dute. Lanerako aitzurra bakoitzak berea eramateko eskatu dute eta parte hartuko dutenei, gainera, "mendian lan egiteko arropa eta oinetako egokiak" jantzita joateko aholkatu diete. Ekintza amaitutakoan, hamaiketakoa eta salda izango da Itziarren, antolakuntzaren eskutik.
Auzolan horretan parte hartzeko aurrez izena eman beharko dute interesdunek. Horretarako hiru aukera daude: Itziarko harrera bulegoan, haren ordutegian (9:00etatik 14:00etara); telefonoz 943-19 92 55 telefonora deituta; edo posta elektronikoko apuntatu@itziar.eus helbidera mezua bidalita. Bihar (otsailak 21) da izena emateko azken eguna.
Etorkizuneko helburua
Itziarko Auzo Udaleko iturriek jakinarazi dutenez, Andutzko paisaia biziberritzeko, han dauden lursailak herri lur bihurtzea da etorkizunera begira duten helburuetako bat, "iturri ezberdinetik lortu daitezkeen diru-laguntzen neurrian, beti ere".