Herriz herri ibili ondoren, Porrotx eta Marimototsen Ostirala iritsi da ikuskizunak geldialdia egin zuen larunbatean (otsailak 15) Itziarren. Lizarbe Guraso Elkarteak antolatutako hitzordua auzo udalaren hamargarren urtemuga ospatzeko egitarauaren baitan egin zen, eta antolatzaileek azaldu dutenez, jendetza bildu Zabalsoro frontoiko harmailetan; zehaztu dutenez, 250 bat haur eta helduk gozatu zuten pailazoen saioaz.
Katxiporreta taldeko pailazo ezagunek giro bikaina jarri zuten eta oso une politak eskaini zituzten Pupu eta Lore bikiek lagunduta. Ikuskizunaz gain, baina, omenaldietarako tartea ere izan zen. Aurten, zehazki, Itziarko Auzo Udaleko kideei egin diete aitortza.
Auzo udaleko kideek adierazi dutenez, "opari xume baina esanahiez betea" jaso zuten pailazoen eskutik. "Ezti-poto bat eman ziguten, euskara bultzatzeko bidea goxatzeko eta indarra hartzeko, eta erle-argizariz egindako kandela bat ere, bide hori argitzeko".