Itziarko familiek Mungiako Izenaduba basoan dagoen Olentzeroren eta Mari Domingiren etxea bisitatu zuten aurreko larunbatean (abenduak 14). Lizarbe Guraso Elkarteak antolatu zuen Itziarko Eguberrietako egitarauari hasiera eman dion lehen ekintza eta, azaldu dutenez, 66 herritarrek parte hartu zuten bertan.
Txangoan parte hartu zutenek Euskal Herriko pertsonaia mitologikoak erreferente dituen ibilbide ludiko-hezitzailea egin zuten lehendabizi. Ordu eta erdiko ibilbidean barrena, Olentzeroz eta Mari Domingiz gain, Anbotoko Mari, Herensuge, Tartalo, lamiak, Basajaun, galtzagorriak eta Mari bezalako pertsonaiak ezagutzeko aukera izan zuten. Amaitzeko, Euskal Herriko ikazkinik ezagunenarekin eta haren lagunekin argazkiak ateratzeko aukera izan zuten.
