Ostegunean (maiatzak 15) Mutrikuko Nautilus museoa bisitatzeko irteera antolatu du Arbil Elkarte Sozialak. Elkartetik adierazi dutenez, Mutrikura joateko bi aukera izango dira: oinez edo autobusez.
Oinez joatea erabakitzen dutenak 09:30ean elkartuko dira portuan, eta handik abiatuko dira Mutrikurantz. Bidaia autobusez egiteko asmoa dutenek, berriz, 10:45ean dute hitzordua autobus geltokian. Itzulera autobusez egingo dutela esan dute. "Nahi duenak 13:20ean autobusa har dezake; bestela, ordubete beranduago bueltatzeko aukera ere izango du, 14:20ean irteten den autobusean".
Irteeran parte hartu nahi dutenek aldez aurretik izena eman beharko dutela gogorarazi dute. Apirilaren 28an zabaldu zuten izen-ematea eta, ohartarazi dutenez, gehienez 50 pertsona joan ahal izango dira bertara. Jardueraren prezioa 5 eurokoa da.