Bihar (maiatzak 1), 12:30ean inauguratuko dute erakusketa, Berrizen bizi den artista bertan dela. Deba-Palestina herri ekimeneko kideek adierazi dutenez, bertaratuek "Libanoko errefuxiatu eremuetan jaiotako artistaren lanei eta bizipenei buruzko azalpenak entzuteko aukera izango dute". Ondoren, luntx bat eskainiko da.
Artista palestinarrak hainbat herrialdetan aurkeztu ditu bere lanak, eta Deban ikusgai izango diren margolan espresionistek eta abstraktuek ere Palestinako errealitatea jorratzen dutela esan dute antolatzaileek. "Erakusketak Palestinako borroka eta kultur aberastasunean murgiltzera gonbidatzen gaitu, erresistentzia, identitatea eta itxaropena bezalako gaiak arakatuz. Bere lanek sufrimendua ez ezik, herri palestinarraren sendotasuna eta gainditzeko espiritua ere erakusten digute zoritxarreko testuinguru batean".
