LAB, STEILAS, ELA eta CCOO sindikatuek apirilaren 1erako eta 2rako (gaurko eta biharko, alegia) egindako greba deialdiarekin bat eginez, Debako Luzaro ikastetxeko irakasle taldeak Foruen Plazara eraman zituen atzo bere aldarrikapenak. Hezkuntza publikoan inbertsioa handitu. Lan baldintzak hobetu! lelopean egin zuten mobilizazioa.
Oraindik ere konpontzeko dago Arabako, Bizkaiko eta Gipuzkoako eskola publikoetako irakasleen lan gatazka eta "lan baldintzak hobetzeko eta hezkuntza publikoa indartzeko" helburuarekin antolatu dituzte lanuzteak. Luzaroko irakasleek gogorarazi dutenez, aldarrikapen eta eskaera zehatzak egin dizkiote Eusko Jaurlaritzako Hezkuntza Sailari. "Kalitatezko Hezkuntza Publikoa nahi dugu eta hezkuntzan benetako inbertsioak egitea", azpimarratu dute. Halaber, besteak beste, "ikasgeletako ratioak jaistea, burokrazioak gutxiagotzea eta erraztea, ikasleen beharrei erantzuteko denbora gehiago izatea, aniztasunari erantzuteko baliabideak eskaintzea, ordezkoen lan baldintzak hobetzea, erosahalmena berreskuratzea, erretiroa hartzeko baldintzak hobetzea eta mediku azterketak egiteko eskubidea bermatzea" eskatzen dute.