Larunbatean (martxoak 29) jokatu zen junior mailako 49. Amaikak Bat Saria GT Tolosa Danena taldeko Eñaut Urcareguik irabazi zuen. 86 kilometroko ibilbide gorabeheratsua osatzeko 02:02:37 denbora behar izan zuen.
GT Tolosa Danena taldeko kidea erakustaldi bikaina eginda gailendu zen Hondartza kaleko helmugan, ikusleen txalo artean. Azken kilometroetako mendateak erabakigarriak izan ziren beste behin, eta Urcareguik argi utzi zuen irabazteko gogoz irten zela.
Sailkapenari dagokionean, Cafe Dromedario-Flotamet taldeko Unai Moran izan zen bigarren (02:03:04) eta Viveros San Anton-Mardu taldeko Beñat Sain hirugarren (02:03:13).
Euria
Inork nahi ez zuen gonbidatua agertu zen oraingoan ere: euria. Zoru bustiak, hortaz, lasterketak duen arriskua handitu egin zuen eta, hala, eguraldiak eragina izan zuen azken emaitzan. Federazioak emandako datuen arabera, 94 parte hartzailek lortu zuten lasterketa osatzea.