Junior mailako lehen eta bigarren urteko txirrindulariek urteroko hitzordua dute bihar (martxoak 29) Deban: Amaikak Bat Saria. Aurtengoa lasterketaren 49. edizioa izango da, eta parte hartzaileek 86 kilometroko ibilbide gorabeheratsua osatu beharko dute.
Amaikak Bat txirrindulari taldeak antolatutako proba 10:15ean abiatuko da Foruen Plazatik, eta irteera neutralizatua izango du Lorea tabernaren pareraino, Mendaroko noranzkoan. Hasierako kilometroetan Elgoibarrera joan-etorria egingo dute eta, ondoren, Debara bueltatu eta Itziar bidea hartuta, Aizarnazabal aldera joko du tropelak.
Handik bueltan, berriro Debara itzuliko dira, eta azken kilometroak, Mutrikuko lurretan egingo dituzte. Kostaldeko errepidetik Mutrikura joango dira lehendabizi, eta hortik Kalbarioko mendaterantz gora abiatuko dira.
Azken txanpan, Sasiolara jaitsi eta Debarako bidea hartu ondoren, Hondartza kalean kokatutako helmugan amaituko da lehia. Aurreikuspenen arabera, lehenengo sailkatua 12:25ak inguruan iritsiko da helmugara.
Eragina trafikoan eta garraio publikoan
Udalak bando bidez jakinarazi duenez, alde zaharreko kaleetara sarrera itxita egongo da trafikoarentzat 08:30etik 14:00era bitartean. Lasterketa N-634 errepidetik ere igaroko da, eta larrialdi arrazoiengatik izan ezik, ibilgailuek ezin izango dute bertako garajeetara sartu-irtena egin lasterketa amaitu bitartean.
Era berean, ordu tarte horretako autobusei ere eragingo die probak. Beraz, autobusa hartu behar izanez gero, bidaia planifikatzeko eskatu dute.